آخر حدود المعصية - شعر : هاني آدم - مجلة قلمي الثقافية

آخر حدود المعصية - شعر : هاني آدم

شعر : هاني آدم , قصيدة بالعامية 
آخر حدود المعصية 


و قبل آخر باب في توبته ما يتقفل 
قرر حزين القلب يتحدي اللي فاضل م الوجع 
قرر يقع في شراك مذاهب عفتك 
يسأل تاريخه علي قبلتك 
يتوضي رجوع
كإنه قبل ما يقتل الحب اللي كان 
بيحلي روحه الطاهره قبل ما تنحني 
كان مغتني بحبة لقا 
و فدان دموع 
و أتاري عمر ما عاشق يشبع من هواه 
و لا ألف آه 
قادره تداويله في لوعته 
ساب سكته 
و طار بالأماني
علي حلم رفرف يوم لقاهم 
و عهد واهم بالتوحد 
في الآهات و الإبتسام 
ساب جتته القادره في بعادها علي الألم 
و لا يوم ندم 
علي موته كافر بالقدر 
مذنب خطر 
علي باله لو حب الصبيه بكل حرف هتنتهي 
ذنوبه اللي طببت الميزان 
و إن الأدان 
من حنجرتها سلسبيل 
مسكين دليل 
عقله اللي فاته و راحلها 
برغم الضنا 
كان نفسه يفضل 100 سنه 
أسير ضلها 
لكن يا دوب 
غير هدوم العشق في النني الحنون 
و كفر جنون 
قبل المعاصي ما تتفق علي كسرته 
و آخر بيبان التوبه يرفض حضرته 
عديت يا مسكين ع الحنين ..
 لآخر حدود المعصيه
التعليقات
0 التعليقات