هبه عيسى : الغيطي مفلس سرق نص الغجرية من محمد الجيزاوي - مجلة قلمي الثقافية

هبه عيسى : الغيطي مفلس سرق نص الغجرية من محمد الجيزاوي

هبه عيسى

المؤلفين المفلسين اللي زي الغيطي ، بتوع مسلسلات سلق البيض اللي وراها سبوبة اعلانات حلوة بيسرقوا النصوص الأدبية من السوشيال ميديا، الغيطي سرق نص الغجرية ل محمد الجيزاوي ونزل كمقدمة لمسلسل مملكة الغجر .
محمد الجيزاوي

 انا عرفت الجيزاوي اصلا من النص ده ، من كم سنة كنت كاتبة عن غجرية في النوت عندي ع الفيس وهو قراه وقالي انا كمان كتبت عن الغجرية ورحت قريت نصه المشار إليه ، ودي كانت بداية صداقتنا على الفيسبوك .
محمد الغيطي
الغيطي طالع بكل وقاحة يقول ان عديمي الشهرة وغير المعروفين بيتمحكوا فيه ، طبعا مهو محدش بيتشهر غير الشلل المسيطرة على سوق الفن في مصر ، الفنانين الحقيقيين بياخدوا زاوية في سلام ويكتبوا او يرسموا او يغنوا ويمثلوا بشكل مستقل الا اصحاب الحظ القليلين وبيتشهروا لانهم يستحقوا فعلا ، الفنان الحقيقي مابيدورش ع شهرة الشهرة هي اللي بتدور عليه
مملكة الغجر
الغيطي ده لو محترم كان مقالش كده لأن شهرتك وانت مفلس وفارغ وغير محترم مش هتنفعك وانت بتكتب علشان تكسب عيشك مش بتكتب علشان تتصدق او يدوملك اثر حقيقي ، بتسرق شهرتك وفلوسك بحروف غيرك يامعدوم الأدب ، الأديب الحقيقي اللي بيقدم نصوص تضيف للفن عمره ما يعمل كده ، انتو بقيتوا كلكوا كده على بعضكم الا من رحم ربي شلة موبوءة فاسدة محتكرة الفن وبتشوهه ، المسلسلات المصرية القديمة كان بيقدمها ويكتبها ناس محترمين زمان ، كانت قوة ناعمة لمصر عند كل العرب ، دلوقتي اللي شبهك ياغيطي حطونا في مؤخرة الدول في تقديم الفن ، الفن اللي كنا رواد فيه،
الكاتب او الروائي الحقيقي في البلد دي بقت دور النشر بتاكل حقه ومؤلفين الغبرة سارقين نصوصه ، يعني مش بعيد لو انا قاعدة مكفية بكتب رواية وسايبة ورايا التلفيزيون مبتفرجش واتسرقلي نص ولا هعرف مين سرق وفاكرين ان كله بيعدي وممكن يعدي لولا الناس اللي بيعلق ف بالها نصك او كلامك ، الواحد مابيتفرجش على روث البعير اللي بيطفح على تلفزيوناتنا ده اصلا ،ومنشغل بكتابته وفنه وممكن ف الاخر يطلعوا يسرقوه وينكروه بكل وقاحة زي ما حصل مع الجيزاوي . بنعمل فن وبنكتب كتابة نرضي بيها نفسنا وبنجتهد علشان نخلي الناس تتذوق حلاوة الفن وف الاخر يتقافز علينا الفارغين ، كل الناس اللي بيكتبوا ياخدوا بالهم بقا علشان ده موسم سرقة
--
هبة عيسى
روائية وفنانة تشكيلية 
صدر لها :
رواية شيطلائكية
رواية أزل
التعليقات
0 التعليقات