شريط الأخبار

المجهول في حياة ماري منيب الزوجة المغدورة والحماه المشهورة

كتب محمد عوض الشافعي :
مارى سليم حبيب نصر الله المعروفة بمارى منيب , أشهر حماه في السينما المصرية , لا يعرف الكثيرين شيء عن حياتها كزوجة وأم , والمأساة التي تعرضت لها في بداية حياتها , والتي إستحقت لأجلها أن نلقبها بالزوجة المغدورة 
ماري منيب

طبعا كلنا عارفين ان مارى منيب مولوده فى لبنان عام 1905 وجت مصر وهى طفلة , مارى من الناس اللي دخلت المجال مبكرا جدا كانت مغنية وراقصة وممثلة .. فنانة متنوعة . 


فى احدى رحلاتها الفنية الى الشام اتعرفت فى القطار وكان عمرها وقتها 14 سنه على شاب فى اوائل العشرينات فنان كوميدى مبتدئ اسمه فوزى منيب ودي صورته ..



فوزي منيب



 نظره منه على نظره منها هوب نزلوا من القطر واتجوزوا , طبعا امها عرفت الموضوع اتجننت وعارضت الجوازه لان فوزى وقتها كان ممثل صغير مستقبله مجهول 



المهم مارى اتمسكت بجوزها ورفضت ضغوط امها , وقررت انها تبدأ من جديد مع فوزى منيب عملوا مع بعض فرقة مسرحية حملت اسم فرقة منيب و فى أولى عروضهم حصل نجاح كبير وتواصلت عروضهم المسرحية الناجحة .



 وفى عام 1920 عرض على الممثل فوزى منيب المشاركة فى بطولة فيلم سينمائى مصري اللي سبق فيلم ليلى لعزيزه امير وهو فيلم قصير بعنوان الخالة الامريكانية قصة الفيلم مشابهه بشكل كبير لفيلم سكر هانم بطوله عمر الحريرى وكمال الشناوى وعبد الفتاح القصرى وعبد المنعم ابراهيم .

سكر هانم


ماري منيب الزوجة المغدورة 

فرقه منيب بعد كده واصلت نجاحها لحد اوائل الثلاثينات وقتها فوزى منيب اتعرف على ممثله اسمها نرجس شوقى , فوزى منيب فى لحظه نسي مارى وكل اللى عملته معاه نسي موقفها من امها لما عارضتها علشان اتجوزته ونسي وقفتها معاه اللى ساعدته لحد ما اصبح ممثل كبير . نسي كل ده . وقرر انه يتجوز نرجس شوقى . 

ولأن فوزى ومارى كانوا مسيحيين وممنوع عندهم الزواج التانى ., ارتكب فوزى غلطة عمره , قرر انه يطلق مارى منيب مستغلا انه كان من مذهب غير مذهبها , حتى يستطيع الزواج من نرجس
حرفيا فوزى منيب رمى مارى فى الشارع هى و أولادها منه فؤاد وبديع . 
على فكره بديع يبقى والد المطرب الراحل عامر منيب 
عامر منيب

مارى اتدمرت لانها حرفيا ما بقاش ليها حد فى الدنيا راحت قعدت عند اختها وكانت متزوجة من المحامى عبد السلام فهمي ( مسلم ) اللى تشاء الاقدار انها تتزوجه بعد وفاة اختها .واشهرت إسلامها بسببه  

عودة ماري منيب للحياة الفنية 

مارى قررت انها زى ما تحدت امها فى زواجها من فوزى منيب , قررت انها تتحدى فوزى نفسه . 
رجعت تانى للعمل الفنى ومن الصفر اشتغلت مع كذا فرقه مسرحيه زى فؤاد الجزايرى و بشاره واكيم وعلى الكسار وعادت مارى منيب لنجوميتها فى المجال الفنى مرة أخرى.

عام 1937 كانت السنه ديه فارقه مع مارى وقتها عرض عليها زوج اختها المتوفيه من سنه قبلها المحامى عبد السلام فهمي الزواج على مارى علشان مارى هى اللى تقدر تربي ولاد اختها . مارى وافقت فورا على الاقل ترد الجميل لعبد السلام فهمي واختها اللى وقفوا معاها فى ازمتها بعد انفصالها عن فوزى 
.
وفى السنه ديه بردوا عرض عليها نجيب الريجانى الانضمام لفرقته اللى كانت وقتها اكبر فرقه مسرحية فى مصر طبعا وافقت ويقال ان نجيب الريحانى كان بيحبها من طرف واحد بس نجيب كان دايما بيخلى مارى معاه شريكه فى ادارة الفرقة المسرحية . 
وتوالت اعمال مارى منيب الناجحه كلنا طبعا فاكرين فيلم نشيد الامل مع ام كلثوم والعزيمه وسي عمر و لعبة الست و ليلة الجمعه افلام كانت ناجحة جدا وطبعا غير عروضها المسرحية مع فرقة الريحانى .

القدر ينتقم لماري منيب من زوجها الغادر 

بينما كانت فى قمة تألقها الفنى كان فوزى منيب بدأت بوادر افول شهرته بداية من عام 1933 انخفض الاقبال الجماهيري على عروضه المسرحيه وانزوى عنه الجمهور حاول تعويض انخفاض شعبيته فى المسرح باللجوء الى السينما فى عام 1936قام بإنتاج وبطولة فيلم الابيض والاسود لكن منى الفيلم بفشل ذريع 
فوزي منيب أبيض واسود

وحاول تكرار الأمر مرة أخرى عام 1940 فى فيلم اصحاب العقول لكن الفشل كان يلازمه ايضا وبعد هذا انزوى الجمهور عنه نهائيا وتركته زوجته نرجس شوقى , ثم بعد ذلك حلت فرقته وعاش وحيدا حتى توفى عام 1947

افتكر ان رغم مرور 50 سنه على وفاة مارى منيب ورغم وفاتها جسديا الا انها مازالت حيه فى قلوب الملايين من المحبين لها مازالت حيه بعفويتها وجمال ادائها وطريقة كلامها و ضحكتها الجميلة :  آااه هاه هاااا
ومن أشهر جملها  
طوبة على طوبة خلي العركة منصوبة
مدوباهم اتنين
انتي جاية اشتغلي ايه 
شاهد فيديوغراف قصير عن ماري منيب 

لكن فوزى منيب افتكر ان محدش هيفتكر له انه كان فى وقت من الاوقات لديه فرقة مسرحية ذات شأن كبير فى عالم المسرح فى العشرينات حتى اوائل الثلاثينات . ومحدش بردوا هيفتكر له انه كان بطل اول فيلم سينمائي مصري
ولو حد افتكره هيفتكر انه كان الزوج الاول لمارى منيب اللى منحها اسمه فقط 

--------
محمد عوض 
ربما تحتوي الصورة على: ‏شخص واحد‏


أقرأ ايضا :

ليست هناك تعليقات:

إرسال تعليق

مجلة قلمي الثقافية Designed by Templateism.com Copyright © 2014

صور المظاهر بواسطة Deejpilot. يتم التشغيل بواسطة Blogger.
Published By Gooyaabi Templates